ولا كلمة أخرسي !!

ماينفعش تضحكي كده بصوت عالي قدام الناس انتي بنت عيب ، ماينفعش تروحي سينما مع صحباتك لوحدكم انتي بنت عيب ، ايه ده انتي ازاي تتناقشي في المواضيع دي انتي بنت عيب ،رحله!! عاوزه تروحي ترحله لوحدك لا طبعا انتي بنت عيب ،البنطلون ده ضيق عيب تلبسيه ،انتي كبرتي قووي لازم تلبسي الحجاب والنقاب ان شاء الله لما تتجوزي ربنا يهديكي ياحببتي ، اقطعي علاقتك بصحبتك فلانه مابرتحلهاش ، اخوكي هيجي يوصلك المشوار ده . كل العبارات دي كانت بتسمعها اميمه يومياً من مامتها ،باباها ، حتي اخوها الاصغر منها عرفوا ازاي ينبتوا فيه الجينات الذكوريه الشرقيه المتخلفه وبدء هو بدوره في فرضها علي اميمه ،، كانت في الرابعه والعشرين من عمرها ولكنها كانت مازالت تشعر وكأنها لم تفطم بعد ...
ماما في شغلانه كويسه غاده صحبتي قالتلي عليها في نفس الشركه اللي هي بتشتغل فيها ومرتبها هايل
شغلانه ايه بس هو انتي محتاجه حاجه علشان تشتغلي؟؟ مااحنا مكفينك من كله وربنا ان شاء الله يرزقك بعريس يبقي من نفس مستوانا ويعيشك ملكه
بس ياماما انا نفسي اشتغل زي كل زميلاتي وصحباتي ،، ياماما انا اتخرجت من كليه التجاره علشان اقعد في البيت؟
لا انتي اخدتي شهاده علشان تتجوزي بيها
اتجوز بيها !! ياماما انا بقيت بخاف من الناس ومابعرفش ابدا اتعامل معاهم
والله احسن وهو بيجي من ورا الناس غير وجع الراس
بس انا نفسي احس بكياني احس اني بنيئدمه ليا راي وليا حياتي الخاصه
حياتك الخاصه !! هي حصلت !! ولا كلمه زياده أخرسي

أميمه ومني واميره وسعاد وسهيله ورنا ودنيا وزينب وماري وغاده وفاتن .......الخ
كل دول بنات بيمروا بنفس السيناريو اللي فات ويمكن اقسي منه بكتير وقد يتطور الامر في النهايه لعلقه سخنه وعلي راي المثل اللي بيقول اكسر للبنت ضلع يطلعلها اربعه وعشرين ضلع ...
طيب كسرتولهم كام ضلع؟؟ ضلع اتنين تلاته اربعه مليون ..طيب الضلوع وعرفنا بيطلع غيرهم ..طيب والعقل اللي حصرتوا ، والكيان اللي هدمتوا ، والفكر اللي جنيتوا عليه من قبل مايثمر. مين ممكن يعوضهم؟
البنت لازم تختار ،لازم تشتغل ،لازم تفكر ،لازم تناقش وتجادل ،لازم تتعامل مع الناس وتعرف ازاي تتصرف في كل مواقف حياتها ، البنت لازم تخرج وتسافر وتروح ، البنت انسان لازم تمارس انسانيتها
وكفايــــــــــــــــــــــــــــــــــة خرسنا كتير قووي