سلام قبل اي كلام
أنا انسانه عايشه في مجتمعنا العربي المصري .عادي يعني لغايه كده مافيش حاجه غريبه ولا تدفع للكتابه والترويح عن النفس (مع اني اشك ) الا انه علشان ماتحبس من اول موضوع اكتبه في اول مدونه ليا وافتح ميت الف باب لسين وجيم وحاء وخاء الي اخر الحروف الابجديه .. بعدت شكلي قوي عن الموضوع نرجع تاني لموضوعنا واللي هو انا ليه فكرت اكتب واعمل مدونه اخرج فيها اي كبت . زي ماقلتلكم انا بنت مصريه شربت من نيلها وبغنلها ،، بحبها بجد بجد بس برضو مخنوقه وعاوزه افضفض ،من كتر مابتحب حد ساعات بتزعل منه قوي لو ضايقك او زعلك ، وزعلك منه بيبقي مختلف تماما لو كان اللي ضايقك ده شخص لا بتحبه ولايهمك من الاساس ،، وانا والله بحب البلد دي وبعشقها وبعشق ترابها وده مش كلام اغاني ده كلام حقيقي طالع من القلب طالع من جوا بجد..
انا فكرت اكتب مش علشان التدوين طالع موضه وعيب قوي لو حد من صحابي سألني عنوان مدونتك ايه ارد واقول ماعنديش واحط راسي في الارض !! لا انا فكرت ادون علشان افكر بصوت عالي واشوف صدي صوتي لفين ولمين هيوصل ..فكرت ادون علشان اشوف هو انا بس اللي مضايقه وله في غيري مضايق ، فكرت ادون علشان الاقي مكان اقول فيه بدل مايجي عليا يوم واكلم نفسي.
سخافات!!!
بالذمه ده اسم مدونه؟؟
والله مانا عارفه بس ده الاسم اللي كنت برد فيه علي حاجات كتير بتحصلي وبتحصل لناس قريبه مني وناس بعيده عني .. دي الكلمه اللي كانت دايما تخطر علي بالي اول مااشوف حاجه تفقعني وتموتني من الغيظ!!
اه سخافات ..بجد سخافات وسخافات قووي
ليه بيحصلنا كده؟؟
اللي هما مين ؟؟
اللي هما احنا
البنات والستات ..ليه بيتبهدلوا في البلد دي كده؟
ليه بقوا الحيطه المايله لكل واحد اطحن لاما في شغله او بيته او حتي في الشارع من واحد تاني؟
انتوا فهمني ؟ عارفين انا عاوزه اقول ايه
عاوزه اقول ليه يارجالــــة فاكرين ان الستات اضعف؟
وعاوزه ازعق قوي في اي واحده واقولها خدي حقكم وماتخفيش انتي ايه ماشفتيش نهي عملت ايه في اللي اتحرش بيها؟
فهمتوا انا ليه قررت أدون؟ وليه سمتها سخافات؟
فعلا معاكي حق في المدونة دي..اكيد كتير من البنات و الستات بيحصلهم حاجات بشعة ووحشه اوي بس انا اللي نفسي اعرفه بجد هما الرجاله ليه بيعملو كده يعني فاكرينها شطاره؟؟؟ مفيش واحد فكر في يوم ان البنت اللي قدامه دي اخته؟!! بس اظن ان سكوتنا كمان بيشجعهم علي كده.. احنا لو بجد اخدنا حقنا زي نهي و كل واحد عمل عمله زي دي يتسجن والله هيبقي عبره لامثاله و مش هيفكره حتي يعملو كده و بقول لكل بنت متخفيش انك تزعقي و لا تتكسفي لان كل الناس هتبقي معاكي لانهم اتعرضو لمواقف زي كده و هيساعدوكي و اكيد هيبقي فاهمين اللي حصل بس اوعي تخافي او تتكسفي لان ده حقك و لازم تدافعي عنه
ردحذففكرتني بحتت مابيفكرش مره انها تكون اخته بفيلم زمان كنت بسمعه وحتي مش فاكره تفاصيله بس كان فيلم ابيض واسود وواحد كان ماشي يعاكس واحده اي نعم كان معاكست زمان غير معاكسات دلوقتي يعني كان عمال يقولها ياحلو ياللي ماشي وكلام لا يتعدي ذلك فالتفت ليه وخلعت البرقع وبتوطي تجيب شبشبها علشان تضربه ويفاجيء الاخ بان اللي كان بيعاكسها اخته !!!
ردحذففطبعا كان مشهد حلو ومضحك بس ليه ابعاد تانيه كان بيفكر فيها اكيد المخرج وقت ماعمل المشهد
المهم ارجع واقولك خدتي بالك من تصرف اللي كانت بتتعاكس برضو في الفيلم وطت علشان تجيب الشبشب والله وسيله دفاع قويه لول